[奇趣異聞] 民建聯成功爭取北極有企鵝

左右紅藍綠：北極爭霸的啟示 2009-06-09

嘉賓主持：張國鈞 (民建聯副主席)



網上版刪剪了「企鵝多」


RTHK網上版

註：網上版本曾作刪改，與正式播映版本有出入，敬請注意。原片中提及「北極人少企鵝多」，「企鵝多」實與常識不符，對此錯誤，謹此致歉。




張國鈞：「北極企鵝多」

網民嘲諷民建聯 成功爭取北極有企鵝 (明報) 2009-06-10

上年民建聯陳克勤一句「try our breast」令佢一夜成名，噚日民建聯副主席張國鈞又「揚威」網上。本身係律師嘅張國鈞，噚日喺港台節目《左右紅藍綠》上，講咗一句「一直以來，北極都係一個非常寧靜，人少企鵝多嘅地方」，有網民即時將段片上載YouTube同大家分享，改咗個標題係「民建聯成功爭取北極有企鵝」，認真搞笑。

港台節目「爆肚」出錯

其實好多人都知道，企鵝只喺南極出現，但係張國鈞就話北極係企鵝多嘅地方，Emily打電話畀張國鈞了解事件，佢都知自己講錯，但解釋話佢原本想講環保議題，希望由北極帶起，自己臨時「爆肚」，隨口噏幾句介紹北極，點知衰咗。

網民揶揄搞「北極企鵝觀賞團」

條片出街發，網民反應迅速，好快Facebook已經有個新group﹕「青年民建聯主席張國鈞話北極有好多企鵝 ! 促請民建聯舉辦『北極企鵝觀賞團』由佢擔任團長 陳克勤帶領搓企鵝胸！」

港台都算好幫忙，Emily噚晚再上港台網站重溫片段時，「企鵝多」嘅字幕已被刪走，張國鈞講嘅時候，呢3個字就無咗聲，但係明明佢個嘴郁郁吓，但就無聲幾秒，都幾突兀。雖然張國鈞講錯嘢，但都好有阿Q精神，佢同Emily講，過往呢類節目都無乜人留意，如果今次失誤可以令人留意到環境保護，咁都算因禍得福。

隔牆有耳：黑白不分 顛倒南北 (蘋果日報) 2009-06-10

民建聯要惡補英文，已經係香港人共識，原來佢哋地理常識都十分驚人。被譽為黨內新星、剛當選副主席嘅律師張國鈞，噚日擔任港台節目《左右紅藍綠》嘉賓講氣候暖化問題，一出鏡就講：「一直以嚟北極都係一個非常之寧靜，人少企鵝多嘅地方……。」

佢講咗兩句，唔少觀眾已經笑咗出嚟，事關好多人都知，北極有熊而冇企鵝，南極先至有企鵝，兩種動物只會在聖誕卡或動物園先有機會同場出現，張副主席指北極企鵝多，擺明搞 gag啫。

港台網版已刪「企鵝多」

節目噚日下午 1點幾鐘出街後，瞬即有人將片段上網，網友睇完「北極企鵝多」偉論後無不笑到反肚，大家以為民建聯政治上顛倒是非、六四史實黑白不分啫，原來連南北都亂晒龍。有人話民建聯成功爭取企鵝北極居留權，應該盡快掛街板邀功，同時舉辦北極企鵝觀光團，由張副主席帶街坊去開吓眼界。

不過大家報團前，最好聽吓曾多次到兩極探險嘅攀山專家鍾健民意見，「我去過北極兩次，南極三次，真係冇試過喺北極見到企鵝。」佢知道張副主席話北極有企鵝後都不禁失笑，「如果有人擺隻企鵝去北極，唔排除企鵝可以喺北極生存嘅。」

何解北極冇企鵝，科學家估計可能同物種遷移或其他環境因素有關。鍾健民指香港人可以喺海洋公園一次過睇晒企鵝、熊貓、中華鱘等各地動物，誤以為北極都咁熱鬧亦唔出奇，張國鈞常識不足無傷大雅，「多啲人講環保問題始終係好事。」

除咗指北極有企鵝，張國鈞喺節目中話加拿大擬於「北極點以南」設陸軍訓練基地亦令人頭，好多人想佢指出邊處係北極點以南；八方翻查資料，估計佢應該係想講加拿大總理到北極圈以南視察時，表示想在北極設基地，張國鈞亂點一通，差之毫釐，豈只千里？

張國鈞獨到見解可以出街，八方相信係因為台長麒叔噚日唔得閒先睇片，俾潛伏嘅反動派有機可乘「陰」到民建聯，網上版已刪除「企鵝多」三個字，好彩可以 YouTube重溫，南北極可以倒轉，「竄改」歷史唔得呀！

話你知

根據維基百科對「企鵝」o既解釋如下：

企鵝（學名：Spheniscidae） 是一種不會飛行的鳥類，屬於企鵝目，企鵝科。主要生活在地球的南半球，目前已知全世界的企鵝共有十七種或十八種，其中四種生活在熱帶赤道，分別是漢波德企鵝、麥哲倫企鵝、黑腳企鵝、加拉帕戈斯企鵝，皆屬於環企鵝屬；完全生活在極地的只有皇帝企鵝及阿德利企鵝兩種。

以前倪匡玩到「南極有北極熊」，今日有民建聯「北極有企鵝」，兩者有異曲同工之妙也！

Fcebook
「青年民建聯主席張國鈞話北極有好多企鵝! 促請民建聯舉辦「北極企鵝觀賞團」由佢擔任團長 陳克勤帶領搓企鵝胸! 」



網友惡搞












網民揶揄搞「北極企鵝觀賞團」