[美女世界] 社民連「張栢芝」林采薇：沒有抗爭 哪有改變

林采薇(波波) 介紹社民連三子及其理念：沒有抗爭 哪有改變





社民連21名新內閣成員中唯一女將林采薇（左一），因為貌以張栢芝令人眼前一亮。


社民連領導層突然出現「翻版張栢芝」（中），在一眾「幫員」中特別矚目。

社民連有個「張栢芝」領導層唯一女將 (明報) 2010-02-01

噚日「丐幫」社民連選新幫主，由陶君行接毓民捧做主席。不過講到最矚目嘅，都唔係呢個新幫主，而係社民連領導層內唯一一個女將，外表嬌滴滴，講口野陰聲細氣、有「翻版張栢芝」之稱嘅林采薇。

外表嬌滴滴 曾衝擊中聯辦

「翻版栢芝」真名叫林采薇，芳齡25歲，喺美國印第安那大學修讀通識教育文憑，依家做緊市場營業代表。雖然佢弱質纖纖，但上次元旦大遊行嗰陣，佢就同社民連曾健成一齊衝擊中聯辦，噚日仲笑笑口話嗰次係佢咁大個女第一次咁激，依家加入社民連都係因為理念相近，希望學吓阿牛同毓民咁，為香港做啲嘢喎！

「翻版栢芝」依家擔任社民連行政委員會成員，不過Emily就覺得應該推佢出去參選，應該吸到唔少男選民嘅選票呀！假以時日練返一身好功夫，話唔埋可以學黃蓉做埋「丐幫」女幫主 ！

隔牆有耳：社民連「栢芝」當選行政委員 (蘋果日報) 2010-02-01

社民連領導層噚日大換血，一眾 50後全部冇得留低。主席黃毓民卸任前，坦言任內最大遺憾係女黨員太少，成個黨陽剛氣太重。新主席阿陶就任後，帶埋一班新內閣出嚟見傳媒，當中雖然只有一位女將咁大把，但已經令在場傳媒眼前一亮，皆因唔少人都覺得，呢位社民連新行政委員有幾分似藝人張栢芝。

花名叫「波波」

據社民連提供資料，翻版栢芝名叫林采薇，做緊市場營業代表，芳齡 25歲，又係 80後。林采薇就話自己花名叫「波波」，坦言第一次去社民連開會時，已經發現只有自己一個女仔，「係比較陽盛陰衰」咁話。

雖然係咁，波波未被嚇窒，因為佢係認同社民連嘅理念先決定入黨。佢仲話，自己已經廿幾歲女，好應該為社會做啲事，「阿牛、毓民付出咁多，見到佢哋可以做到咁多嘢，係咪我哋連少少嘢都唔做呢？所以決定幫吓手。」

社民連栢芝唔止睇得，原來亦有唔少實戰經驗，上次「衝擊中聯辦」事件中，佢都有跟住阿牛去抗議。至於佢會唔會幫新主席手，招攬多啲女仔入黨，佢就坦言有相當難度，因為好多女性朋友都對政治冇乜興趣。八方諗，就算佢招攬唔到女黨員，社民連男黨員人數嚟緊都可能驟升。