壹週刊 第993期 2009-03-19
還甘比母女清白 大劉賜姓
近日有傳大劉劉鑾雄以1.8億購入山頂歌賦山里、一間連花園超過一萬呎的獨立屋，送給曾公開質疑甘比（陳凱韻）B女「經手人」身份的呂麗君，作為「和好如初」禮物。
[繼續閱讀...]
只可惜，曾經在大劉頭上動土的呂麗君，得寵地位不及以往，至於億八豪宅真正「受益人」，係個女叫劉秀樺，出世紙上，父親姓名一欄寫住劉鑾雄三個字，母親一欄是「助手甘比」的陳凱韻。
真相大白
自從去年十月甘比誕下八磅重B女，疑似「經手人」的大劉，曾公開說：「我相信個女係我或者唔係我，都係我私事，唔需要公開討論。」
反而「女朋友」呂麗君睇唔過眼，向傳媒發出公開信，以「劉太」自居的她，強調甘比是「我們的助手」，並以「不知道誰是女嬰父親」等字眼作出質疑，觸怒了大劉的神經線，指責呂麗君行為無腦，鞠躬一百次都無用。
家庭糾紛搬上報章頭條，雖然呂麗君極速獲大劉原諒，但甘比B女出世轉眼五個月，父親真正身份，外界仍然「估估吓」！最有力證據，莫過於一張出生證明書。
根據香港生死登記處紀錄，甘比B女姓劉，全名劉秀樺，與大劉的長女劉秀融、二女劉秀盈（呂麗君所生），同樣採用「秀」字輩，加上父母親登記人是陳凱韻（甘比真名）以及劉鑾雄，有大劉賜姓，終還甘比母女一個清白。
甘比B女叫劉秀樺，經手人係大劉，有證有據。
心情興奮
長子劉鳴煒已為人父，大劉升級做阿爺，但有傳他依然想追多個仔，雖然甘比未能一擊即中，但大劉對B女一樣痛錫。
「雖然大劉唔係第一次做人老豆，但佢成日响朋友面前讚個細女肥嘟嘟好得意，加上甘比聽教聽話，又自己湊女，唔似得呂麗君生完個女，就走咗去英國讀書，揼低自己個女幾年乜都唔理，大劉唔出聲，但心中有數，佢仲成日同班朋友講笑話而家多咗個女，要俾心機搵多啲錢！」知情人說。
有「股壇狙擊手」之稱的大劉，早前自爆金融海嘯前大賺四十億，之後自稱因為匯豐股價急瀉，搞到倒輸三十億，唔見咗筆，但為了甘比母女，他依然重重有賞。
去年尾，便有人親眼目睹大劉帶住剛剛坐完月的甘比，到山頂一帶物色豪宅，其中對山頂歌賦山里的獨立屋特別有興趣。
平價買入
山頂獨立屋供應買少見少，大劉睇中的歌賦山里洋房，室內面積多達五千六百多呎，另設有五千三百多呎的花園、天台及私家恒溫泳池，每幢均坐北向南，遠眺海景。
根據紀錄，單位原業主為柏寧酒店陳澤富家族或有關人士，○七年十月樓市旺勢時，以二億多元向東亞銀行主席李國寶購入。
直到去年尾，金融海嘯令豪宅造價急挫，柏寧家族決定以低於市場價放售止血，吸引多名城中富豪食指大動，除了大劉，還有電盈大股東李澤楷、漫畫家馬榮成以及莊士國際主席莊紹綏等。
「大劉同甘比喺聖誕節之後去歌賦山里睇樓，為免張揚，當日甘比同大劉各自坐車去山頂會合，佢哋睇完都好鍾意，過年後就決定買入。」知情者說。
除了景致一流吸引大劉，單位造價重回李國寶○七年三月的一億八千萬買入價，亦是大劉願意促成交易的原因之一。
各有所得
大劉買下心頭屋，消息很快傳遍地產界，更有指豪宅女主人是呂麗君，然而，真正「受益人」其實是母憑女貴的甘比。
「大劉份人好有計劃好公平，早排佢自己都講過，因為一場大病，驚有咩冬瓜豆腐，呂麗君兩母女唔知點算，於是俾咗一大筆錢佢傍身，唔係點會話佢有錢身痕，走去發聲明質疑甘比個女老豆係邊個呢！甘比都咁耐啦，又生咗女，大劉當然會幫佢安排好一切。」知情人說。
有億八豪宅在手，已成功修身的甘比，平日除了忙於湊女，每日中午時分陪大劉到福臨門午膳外，每逢過時過節出埠，大劉都一定帶甘比在身邊。
「啱啱個農曆年佢哋先去完賭城，上個月又一齊去咗泰國，連大劉一家都對甘比好。」知情者說。一句講晒，有女萬事足。
生仔有派彩
大劉賜姓再送豪宅慰勞甘比，其實圈中亦有唔少母憑女/子貴例子。
徐子淇
千億新抱徐子淇再懷第二胎，雖然未公布係仔定係女，但老爺李兆基知道又有孫抱，大手筆送上「惠苑」單位，作為三年抱兩獎勵計劃的獎品。其實徐子淇嫁入李家，已獲四千呎惠苑單位作新婚愛巢，現時兩個單位已打通裝修，預計今年年中可以入伙。
張栢芝
去年七月，謝霆鋒以9,638萬買入赤柱舂坎角海天徑三千多呎獨立屋，送給太太張栢芝及仔仔Lucas，可惜單位未正式入伙，卻遇上豪宅樓價急挫，現時單位賬面價起碼唔見兩成。
蔡加敏
玩具大王蔡志明長女蔡加敏，○七年尾大肚下嫁東華前主席馬鴻銘，獲父親贈送市值4,000萬，合共八千呎的沙田豪宅作為新婚禮物；翌年五月，蔡加敏誕下女兒Chelsi，首次做外公的蔡志明終於一嘗抱孫滋味。
搵錢最緊要
財經雜誌《福布斯》早前公布○九年全球富豪排行榜名單，身為華人置業（0127）主席的大劉，全球排名由去年的247位，大幅上升到132位，跳升115級；至於全港富豪排行位置，亦躋身第5位，排行高於uncle鄭裕彤，大劉身家估計高達40億美元。
雖然外界對大劉的排行位置嘖嘖稱奇，但話到明多咗個女要努力搵錢的他，近日再次發揮「股壇狙擊手」本色，在股票市場動作多多。
包銷15億匯控
自稱金融海嘯後，因為匯控股價急瀉，搞到要倒輸30億的大劉，對5號仔依然情有獨鍾，更第一時間表示會供股，旗下天發證券便預留二億美元，相等於15.6億港元作為匯控的分包銷商。「唔睇好，我就唔會分包銷，就算冇人供，呢個價（供股價28元）分包銷亦好抵，要兩億（美元）其實少咗，應該要多5億（美元）。」
撐電盈私有化
早前電盈（008）提出私有化，搞到滿城風雨，大劉主動開記者會否認幫手「種票」，更自稱只係一個「生意佬」，大手買入電盈，無非想掹車邊賺錢，還口快快自爆自己有三個女。
「買呢隻股票（電盈）係想賺錢，生意佬做任何嘢係得賺錢一個動機，冇受任何人指使同壓力（指種票）……諗返轉頭我都蠢，我應該叫番一千幾百個員工轉晒名，又或者送股票俾佢哋投贊成票……我得一個仔三個女，總之我冇安排任何一個員工投票。」
放棄買飛機
除了搵街外錢，愛買飛機當玩具的大劉，有消息指他有意購入造價高達13.88億港元的787Dreamliner私人飛機。
但近日外傳大劉因身家縮水，被迫「撻訂」，不過亦有指他因早在去年中以11億買下兩架Gulfstream的G650私人飛機，已經有兩架新玩具的大劉，對787Dreamliner購買意欲一閃即逝。
重重有賞
大劉送禮俾身邊女人一向「重手」，無論甘比定係呂麗君，各人手上物業市值，加起來足夠食過世。
沒有留言:
發佈留言